سي مصطفى بن جعفر

سي مصطفى بن جعفر شارك يوم 8 ماي 2011 في نقاش تلفزي حول خطاب الباجي قايد السبسي في قناة نسمة وحب يلبس جبة ثورية ما جاتش على قياسو على خاطرو يفركح ويجري مع الجماعة اللي دازين فيها ثوريين في مرحلة ماهيش متاع ثوريين وهو مسيكن لا نجم يحكي كيف أحمد نجيب الشابي ولا كيف أحمد ابراهيم اللي حبوا يظهروا شوية هكة تحمل مسؤولية ولا نجم يكون كيف حمة الهمامي ولا كيف جماعة النهضة وضاع فيها بازقة ... عمل تخريجة غاية في البهامة وموش عارف كيفاش هذاكا طبيب قال اللي التجمعيين الحقيقيين ما يفوتوش 40 ألف في تونس قلنا برا نمشيو معاه بالك بالحق وإذا كانوا ما يفوتوش 40 ألف معناها ما ينجموش ياخذوا حتى بقعة في المجلس التأسيسي ولكنو خايف العزا مناش خايف خايف لا التجمعيين يخرجوا من الباب يرجعوا من الشباك تي كيفاش ينجموا يرجعوا وهوما ما يفوتوش 40 ألف أشكون باش يرجعهم أشكون باش يصوتلهم ... على كل الجماعة هاذم ساعات يكسرولي المازمبي بالتقوعير والبهامة وعاملين فيها قيادات سياسية يتمنكو على خلق ربي تي ماهو يا قوش جملة وحدة وإلا كون مسؤول آما العصا من الوسط ما تنجم كان تلعب بيها آما ما تنجمش تضرب بيها ... بربي يا سي جعفر ما تتغشش وفيق على روحك يعيش خويا راك راجل .